2025-nji ýylyň 26-njy noýabrynda Ýagşygeldi Kakaýew adyndaky Halkara nebit we gaz uniwersitetinde “Sanly innowasion tehnologiýalaryň geljegi we ylym-bilim ulgamyna ornaşdyrylyşy” atly halkara ylmy-amaly maslahat we sergi utgaşykly görnüşde geçirildi. Şanly senä bagyşlanan çärä 22 ýurtdan diýen ýaly 1500-e golaý hünärmenler, alymlar hem-de talyplar gatnaşdylar.

Maslahata gatnaşyjylar ilki bilen uniwersitetiň giň eýwanynda täze sanly çözgütleriň, interaktiw okuw serişdeleriniň hem-de ýerli mugallymlaryň we talyplaryň ösüşlerini görkezýän sergini synladylar. Soňra halkara maslahatyň açylyş dabarasy bolup, onda sanly innowasiýalaryň ösüş ugurlary, olaryň ylym-bilim ulgamyna ornaşdyrylmagy we bu ugurda halkara hyzmatdaşlygyny giňeltmek meseleleri ara alnyp maslahatlaşyldy.

Forum işini üç ugruň — “Bilim ulgamynda sanlylaşdyrma”, “Kiberhowpsuzlyk we emeli aň” hem-de “Durnukly ösüşde sanly ykdysadyýet” bölümleriniň çäklerinde dowam etdirdi. Umumy mejlisde 30-dan gowrak, bölümlerde bolsa 120-den hem köp ylmy çykyş diňlenildi. Çykyşlarda Türkmenistanda sanly tehnologiýalaryň okgunly ösýändigi, bu ösüşiň bolsa uzakmöhletleýin ösüş maksatnamalarynyň üstünlikli durmuşa geçirilmegi bilen baglanyşyklydygy bellenildi.

Maslahatyň dowamynda halkara hyzmatdaşlygyny giňeltmegiň ähmiýeti nygtalyp, daşary ýurtlaryň ýokary okuw mekdepleri we ylmy merkezleri bilen hyzmatdaşlygy pugtalandyrmak boýunça taýýarlyk beýan edildi. Şeýle hem döredilýän şertler üçin Gahryman Arkadagymyza we Arkadagly Gahryman Serdarymyza hoşallyk sözleri aýdyldy.