Berkarar döwletiň täze eýýamynyň Galkynyşy döwründe Garaşsyz, hemişelik Bitarap Türkmenistanda durmuş-ykdysady ösüşiň möhüm wezipelerini üstünlikli çözmeklige oýlanyşykly çemeleşilýär. Täze taryhy döwürde eýelenýän belent sepgitler Gahryman Arkadagymyz tarapyndan başy başlanyp, hormatly Prezidentimiziň baştutanlygynda üstünlikli dowam etdirilýän parasatly we öňdengörüjilikli syýasatyň netijesidir. Giň gerimli özgertmeler strategiýasy, ilkinji nobatda, milli ykdysadyýetimizi döwrebaplaşdyrmaga we senagatlaşdyrmaga, daşary ýurtlardan getirilýän harytlaryň ornuny tutýan eksport ugurly önümleri öndürmäge ýöriteleşen döwrebap kärhanalary döretmäge gönükdirilendir. «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynyň», «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasynyň», Oba milli maksatnamasynyň, «Türkmenistany 2024-nji ýylda durmuş-ykdysady taýdan ösdürmegiň we maýa goýum Maksatnamasynyň» hem-de beýleki Prezident maksatnamalarynyň üstünlikli amala aşyrylmagy netijesinde, döwletimiziň ykdysady kuwwaty artyp, halkara abraýy pugtalanýar, halkymyzyň hal-ýagdaýy barha ýokarlanýar.
Ýurdumyzyň baş şäheri Aşgabat bu günki günde Türkmenistanyň däl, eýsem, dünýäniň iň arassa we gözel şäherleriniň birine öwrüldi. Paýtagtymyzda saglyk, bilim, terbiýeçilik, medeniýet ulgamlarynyň, myhmanhana toplumynyň we beýleki ugurlaryň täsin merjen binalary ulanylmaga berilýär. Ähli sebitlerimizde ýol gurluşygynyň desgalary yzygider gurulýar. Sebitiň taýsyz Arkadag şäheriniň ikinji tapgyrynyň gurluşygy bedew bady bilen alnyp barylýar. Munuň özi ýurdumyzyň ykdysady kuwwatynyň pugtadygyny aýan edýär.
Milli ykdysadyýetimiziň ösüşinde nebitgaz toplumynyň pudaklarynyň aýratyn saldamly goşandynyň bardygyny bellemelidir. Garaşsyzlyk ýyllarynda ýurdumyzyň nebitgaz toplumy bütinleý özgerdi. Täze iri taslamalar durmuşa geçirildi, häzirki wagtda birnäçe desgalaryň gurluşygy dowam edýär. Ýurdumyzda nebitgaz senagaty diwersifikasiýa ýoly bilen ösdürilýär. Gaýtadan işleýän täze önümçilikler gurulýar, öň bar bolanlarynyň kuwwatlylygy artdyrylýar hem giňeldilýär. Gaz, nebit önümleriniň daşary bazara ugradylyşy, sarp edijileriň islegleriniň ýokarydygy nazarda tutulyp, barha artdyrylýar.
Hormatly Prezidentimiz Türkmenistanyň sebitlerinde täze gaz ýataklaryny açyp, olary senagat taýdan özleşdirip, tebigy gazyň çykarylyşyny düýpli artdyrmak barada möhüm tabşyryklary berýär. Döwlet Baştutanymyzyň beren gaýragoýulmasyz tabşyryklaryny we görkezmelerini ýerine ýetirmek boýunça «Türkmengaz» döwlet konserni tarapyndan netijeli işler alnyp barylýar. Konserniň zähmet köpçüligi ýylyň-ýylyna «mawy ýangyjy» çykarmak boýunça öz öňlerinde goýlan iş meýilnamalaryny üstünlikli berjaý edýärler. Alnyp barylýan işleriň netijeli bolmagyny gazçylaryň, nebitçileriň, geologlaryň gaýratly, tutanýerli, agzybirlik bilen çekýän ýadawsyz zähmeti üpjün edýär. Nebitgaz senagatynyň işgärleri, işçi-hünärmenleri üçin döwletimiz tarapyndan ähli amatly şertleriň döredilmegi hemmelerde buýsanç döredýär. Hormatly Prezidentimiziň tagallasy bilen nebitgaz toplumynyň daşary ýurtlaryň döwrebap tehnologiýalary we tehnikalary bilen üpjün edilmegi amala aşyrylýan işleriň çalt depginde, ýokary hilli bolmagyny şertlendirýär. «Pähim-paýhas ummany Magtymguly Pyragy» ýylynyň sentýabr aýynda badalga berlen energetika taslamalary hem degişli pudagyň öňünde duran wezipeleri çözmekde has ähmiýetlidir.
Şu günler türkmen halky Halkara Bitaraplyk gününi toýlamaga uludan taýýarlyk görýär. Bu baýramçylygyň dowamy Nebitgaz senagaty we geologiýa işgärleriniň güni bilen utgaşyp gidýär. Goşa baýrama ähli pudaklarymyz, şol sanda nebitgaz toplumynyň işgärleri zähmet ýeňişleri bilen barýar. Ýurdumyzyň şöhratyna şan goşup, ösüşlere, özgerişlere saldamly goşant goşýan zähmet adamlaryna hemişe üstünlik arzuw edýäris. «Döwlet adam üçindir!» diýen baş ýörelgäni tug edinýän ulus-ilimiz döredilýän ähli şertleriň özleri üçindigine berk ynanyp, Gahryman Arkadagymyzyň, Arkadagly Gahryman Serdarymyzyň daşyna barha berk jebisleşýär.
Çeşme: «Nebit-Gaz» gazeti
