Türkmenistanyň Oguz han adyndaky Inžener-tehnologiýalar uniwersitetinde ýurdumyzyň orta mekdepleriniň 9-12-nji synp okuwçylarynyň arasynda geçirilen “Oguz hanyň zehinli nesilleri” atly III integrirlenen olimpiadanyň ýeňijilerini sylaglamak dabarasy geçirildi.
Bäsleşigiň netijelerine laýyklykda, 33 mekdep okuwçysy baýrakly orunlara mynasyp boldy.
Olimpiadada üstünlikli çykyş edip, ýurdumyzyň orta mekdeplerinden 11 okuwçy birinji orun eýeledi. Olaryň hatarynda - Pälwan Ilmämmedow , Maksat Tyllaýew, Rüstem Jumaýew, Diýar Döwletow , Hudaýguly Hudayberenow, Aýlar Orunowa we Näzli Serdarowa. Olar Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň okuwçylary.
Aşgabat şäherindäki 86-njy mekdebiň okuwçylary Ülker Ahmedowa we Şatlyk Jumageldiýew, paýtagtyň 87-nji mekdebiniň okuwçylary Ýusup Resulow we Parahat Ojarow hem birinji orny eýelediler.
8 sany okuwçy ikinji we 14 sany okuwçy bolsa üçünji orunlara mynasyp boldular. 16 mekdep okuwçysy intellektual bäsleşigiň höweslendiriji baýragynyň eýeleri boldular.
Olimpiadanyň ýeňijilerine Türkmenistanyň Oguz han adyndaky Inžener-tehnologiýalar uniwersitetiniň adyndan medallar, diplomlar we gymmat bahaly sowgatlar gowşuryldy.
Matematika, fizika, himiýa, biologiýa boýunça “Oguz hanyň zehinli nesilleri” III integrirlenen olimpiada 3 tapgyry öz içine aldy we şu ýylyň mart aýynda başlandy. Bäsleşigiň birinji tapgyrynda ýurduň dürli künjeklerinden 2500 mekdep okuwçysy bäsleşdi. Olaryň 1000-den gowragy intellektual göreşi ikinji tapgyrda dowam etdirdi. Dersler boýunça iň oňat 60 hünärmen olimpiadanyň jemleýji tapgyryna geçdi.
Uniwersitetde geçirilen jemleýji tapgyryň çäginde bäsleşigiň jemleýji tapgyryna gatnaşyjylar üçin tomusky okuw guraldy. Okuwa intellektual we sport ýaryşlary, döredijilik we medeni ýygnaklar, dürli dersler boýunça goşmaça sapaklar, şeýle hem häzirki zaman ylym we bilim ugurlaryna bagyşlanan gyzykly okuw kurslary girdi.
Mekdep okuwçylary üçin çäreler uniwersitetiň "Bilim dünýäsi" we "Cybersport" innowasiýa merkezlerinde, şeýle hem uniwersitetiň döwrebap enjamlar bilen enjamlaşdyrylan gözleg we ylmy barlaghanalarynda geçirildi. Jemleýji tapgyra gatnaşyjylar häzirki zaman ylmynyň ösüşi we gazananlary barada Germaniýanyň, Türkiýäniň we Hytaýyň meşhur alymlary tarapyndan berlen leksiýalary aldylar.
Öňki ýyllarda Olimpiada gatnaşan 146 mekdep okuwçysynyň 113-siniň häzirki wagtda bu abraýly uniwersitetde dürli ugurlarda okaýandygy bu taslamanyň netijeliligini doly tassyklaýar.
Olimpiada, ylym we bilim ulgamynda ileri tutulýan meseleleriň ýerine ýetirilmegine üstünlikli goşant goşýar. Şolaryň arasynda -ýurduň ýokary we orta bilim edaralarynyň arasynda täsirli aragatnaşygy berkitmek, ýaş nesliň ylym bilen meşgullanmaga bolan gyzyklanmasyny höweslendirmek we goldamak, innowasiýa tehnologiýalaryny üstünlikli ulanmaga ukyply, zehinli, işjeň ýaşlary terbiýelemek, berlen meseleleri giň we özbaşdak çözmek.
