Şu ýylyň 23-24-nji aprelinde geçiriljek Türkmenistanyň ykdysadyýetine daşary ýurt maýa goýumlaryny çekmek boýunça halkara forumy (TEIF 2025), iri halkara guramalarynyň we hökümetara gurluşlarynyň wekilleriniň we ýolbaşçylarynyň ünsüni özüne çekýär.

Maslahatda çykyş edenleriň arasynda BMG-niň Aziýa we Ýuwaş umman sebiti boýunça ykdysady we durmuş komissiýasynyň ýerine ýetiriji sekretary Armida Salsia Alisjabana, Nebiti eksport ediji döwletler guramasynyň (OPEK) baş sekretary Haýtam Al-Gaýs, Energetika Hartiýasynyň Baş sekretary Atsuko Hiroşi, Ählumumy Gaz Merkeziniň (GGC) ýerine ýetiriji direktory Waleri Dýukro we beýlekiler bolar. Ýokary wezipeleri eýeleýän tassyklanan çykyş edýänleriň gatnaşmagy ýakyn wagtda geçiriljek çäräniň möhüm mümkinçiligini görkezýär. Forumyň Günorta-Gündogar Aziýanyň çalt depginde ösýän ykdysady merkezi Kuala-Lumpur şäherinde geçirilmegi, bu sebitden Türkmenistanyň ykdysadyýetine daşary ýurt maýa goýumlaryny çekmäge gönükdirilen gepleşik meýdançasyny döreder.

Energetika pudagyny ösdürmäge we Türkmenistanyň ykdysadyýetine daşary ýurt maýa goýumlaryny çekmäge bagyşlanan TEIF 2025 Türkmenistanda işleýän ählumumy energetika kompaniýalarynyň goldawyny aldy. “Petronas”, Türkmenistanda we Malaýziýada energetika pudagyny ösdürmäge ygrarlydygyny tassyklap, baş hyzmatdaş hökmünde çykyş etdi. Watanymyzyň nebit we gaz pudagynda uly göwrümli taslamalary durmuşa geçirýän Hytaý Milli Nebit Korporasiýasy (CNPC) platina hyzmatdaş hökmünde foruma goşuldy. Türkmenistanyň ykdysadyýetiniň dürli pudaklarynda köp ýyllyk tejribesi bolan Günorta Koreýanyň Hyundai Engineering Ltd. bu çäräniň kümüş hyzmatdaşy boldy.

Foruma gatnaşmagy meýilleşdirýän kompaniýalaryň sanynyň köpelmegi, halkara işewürliginiň geljegi uly maýa goýum mekany hökmünde Türkmenistanda dowamly gyzyklanmasyny görkezýär. TEIF 2025-iň çäginde gatnaşyjylar täze pudak taslamalaryny, durnukly ösüş meselelerini we halkara hyzmatdaşlygynyň geljegini ara alyp maslahatlaşarlar. Forum, Türkmenistanyň maýa goýum syýasaty we onuň durnukly ösüş strategiýasy esasynda özara peýdaly hyzmatdaşlygy gurmak üçin esasy platforma öwrüler. Bu, halkara maýadarlaryň ynamyny güýçlendirýär we “Halkara parahatçylyk we ynanyşmak” ýylynda möhüm ähmiýete eýe bolan çalt üýtgeýän ählumumy maliýe we ykdysady şertlerde olar üçin täze mümkinçilikler açýar.

Şeýle hem, TEIF 2025-iň öňdebaryjy dünýä we sebitleýin habar beriş serişdeleriniň ünsüni özüne çekýändigini bellemelidiris. Bu çäräni Türkmenistandaky esasy habar beriş serişdeleri beýan etmekden başga-da, S&P Global Platts, Malaýziýanyň Nebit, Gaz we Energetika Hyzmatlary Geňeşi (MOGSC) we Nebit Inžerenerleriniň Jemgyýeti (SPE) Kuala-Lumpur bölümi ýaly abraýly pudaklaýyn neşirleri goldaýar. Mundan başga-da, forumyň halkara köpçülikleýin habar beriş serişdeleri babatyndaky hyzmatdaşlarynyň hataryna NewsBase, Argus, The Edge, Interfax, Natural Gas World, TRT, Bernama we Investor Beyond ýaly iri media gulluklary girýär. Bu habar beriş gulluklary çäre barada maglumatlaryň halkara işewürlik jemgyýetine çalt ýaýradylmagyny üpjün edip, wakalaryň geçirilýän ýerinden göni we giňişleýin hasabatlary hödürlemek arkaly dünýäde giň gerime eýe bolar. Hünärmenleriň we bütindünýä nebit-gaz kompaniýalarynyň bilelikdäki işiniň çäginde anyk teklipler yglan ediler, maýa goýum şertnamalaryna gol çekiler we dünýä metbugatynda habarlar üçin gymmatly maglumat mazmunyna öwrüljek möhüm ykdysady kararlar kabul ediler.

TEIF 2025-i geçirmegiň diňe bir Türkmenistan üçin däl, eýsem üýtgeýän gurşawda dünýä energiýa bazary üçin hem diýseň möhümdigi Londonda geçirilen ýakynda geçirilen energetika forumlarynda tassyklandy. Çäräniň intellektual hyzmatdaşy “S&P Global Platts” tarapyndan gurnalan Halkara Energetika hepdeligine gatnaşyjylar meýilleşdirilen başlangyçlary goldaýandyklaryny mälim etdiler. Şu nukdaýnazardan, Türkmenistanyň ykdysadyýetine daşary ýurt maýa goýumlaryny çekmek boýunça halkara forumy (TEIF 2025), “Uglewodorod ýataklaryny özleşdirmekde innowasion tehnologiýalary ornaşdyrmagyň ekologik jähtleri” atly ylmy-amaly halkara maslahaty (TESC 2025) we “Türkmenistanyň nebiti we gazy-2025” atly 30-njy halkara maslahaty we sergisi (OGT-2025) ýaly halkara hyzmatdaşlygy berkitmäge şol sanda, senagat hyzmatdaşlygyna we maýa goýumlaryna esaslanýan ykdysady abadançylygy ösdürmäge ýardam berjekdigi bellenildi.

Häzirki wagta çenli 21 döwletden 130-dan gowrak wekilleriň, şol sanda öňdebaryjy döwlet we hususy kompaniýalaryň, halkara guramalaryň we ykdysadyýetiň dürli ugurlaryndaky bilermen jemgyýetiniň wekilleriniň foruma gatnaşjakdygy tassyklandy.

Çärä ýazylmak 2025-nji ýylyň 15-nji apreline çenli dowam eder. Forum barada has giňişleýin maglumaty TEIF 2025 resmi web sahypasynda alyp bilersiňiz.

Çeşme: «Türkmenistan: Altyn asyr»