Ýurdumyzda bellenilen Nebitgaz senagaty we geologiýa işgärleriniň güni mynasybetli, «Türkmennebit» döwlet konserniniň «Nebitgazdüýpliabatlaýyş» trestine täze «LG C360» kysymly maýyşgak nasos kompressor turbaly tehnikalar toplumynyň 3-si we awtobuslar gelip gowuşdy. Olar Hytaý Halk Respublikasyndan satyn alyndy.
Berkarar döwletimiziň ykdysady kuwwatynyň artmagyna goşant goşmak ugrunda gaýratly zähmet çekýän konserniň zähmet toparlary hormatly Prezidentimiziň satyn alyp beren has kämil ýöriteleşdirilen tehnikalar toplumyny we awtobuslary ýokary ruhubelentlikde kabul etdiler. Ýeri gelende, Hytaýdan gelip gowşan bu tehnikalaryň düzümindäki köpugurly tehnikalaryň önüm bermesini kemelden ýa-da bütinleý bes eden guýularda düýpli abatlaýyş işlerini ýokary hilli amala aşyrmaga mümkinçilik berýändigini bellemek gerek. Olaryň kömegi bilen wagtlaýyn hereketsiz duran we guýynyň içinde gaýry zatlaryň baslygyp galmagy netijesinde emele gelen çylşyrymly bökdençlikleri aradan aýyrmak işi ýerine ýetirilýär. Şonuň ýaly-da, düýpli abatlaýşa garaşýan guýulary öz wagtynda dikeldip, ulanyşa tabşyrmak üstünlikli ýola goýulýar. Bu tehnikalar toplumynyň ýany bilen sorujy enjamlar, awtoçelekler, kiçi elektrik desgalary, ähli amatlyklary bolan medeni öýjagazlar hem-de ätiýaçlyk şaýlar gelip gowuşdy.
Täze tehnikalary we awtobuslary garşylamak dabarasynda çykyş edenler milli ykdysadyýetimiziň binýatlyk pudagy bolan nebitgaz pudagyny yzygiderli ösdürmek ugrunda irginsiz tagalla edýän Arkadagly Gahryman Serdarymyza hoşallyklaryny beýan etdiler. Soňra milli däplere eýerip, kümüş saçly eneler önümçilikde möhüm ähmiýeti bolan kuwwatly tehnikalara ak un sepdiler. Nebitgaz pudagynda köp ýyllap zähmet çekip, häzir hormatly dynç alşyň hözirini görýän il sylagly ýaşululardyr bu ýere ýygnanan köp sanly nebitçiler täze tehnikalaryň mümkinçilikleri bilen tanyşdylar. Ýokary ruhubelentlik ýagdaýynda geçen dabaradan soňra, guýulary düýpli abatlamaga niýetlenen täze tehnikalar toplumy we nebitçileri iş ýerlerine gatnatjak awtobuslar konserniň uglewodorod çig mallaryna baý ýataklaryna dabaraly ýagdaýda ugradyldy.
Nebitgaz senagaty we geologiýa işgärleriniň hünär baýramçylygynyň bellenilen pursatlarynda ajaýyp sowgatlara eýe bolan nebitçiler Gahryman Arkadagymyza hem-de Arkadagly Gahryman Serdarymyza döwletimiziň berkararlygy, halkymyzyň bagtyýarlygy ugrunda amala aşyrýan beýik işlerinde mundan beýläk-de rowaçlyklaryň ýaran bolmagyny arzuw etdiler.
Çeşme: “Türkmenistan“ gazeti
